آئی سی سی نے ٹیسٹ میچز کو 4 روزہ کرنے پر آمادگی ظاہر کردی: برطانوی میڈیا

برطانوی میڈیا نے دعویٰ کیا ہے کہ انٹرنیشنل کرکٹ کونسل (آئی سی سی) نے ٹیسٹ میچز کی مدت پانچ دن سے کم کرکے چار دن کرنے پر آمادگی ظاہر کر دی ہے۔

میڈیا رپورٹس کے مطابق ٹیسٹ میچز کو چار روزہ کرنے کی تجویز کا مقصد ٹیسٹ کرکٹ کھیلنے والے چھوٹے ممالک کو زیادہ مواقع فراہم کرنا ہے تاکہ وہ مزید ٹیسٹ سیریز کھیل سکیں۔ آئی سی سی نے اس تجویز کی حمایت کا عندیہ دیا ہے۔

رپورٹ میں بتایا گیا ہے کہ یہ تجویز ورلڈ ٹیسٹ چیمپئن شپ کے 2027-29 سائیکل کے لیے زیر غور ہے، جس کے تحت چھوٹے ٹیسٹ کھیلنے والے ممالک کے لیے چار روزہ میچز کا فارمیٹ متعارف کرانے پر غور کیا جا رہا ہے۔

تاہم آسٹریلیا، بھارت اور انگلینڈ جیسے بڑے ممالک بدستور روایتی پانچ روزہ ٹیسٹ میچز کھیلتے رہیں گے۔

واضح رہے کہ یہ تجویز رواں سال ورلڈ ٹیسٹ چیمپئن شپ کے فائنل کے دوران سامنے آئی، جس کی حمایت آئی سی سی کے چیئرمین جے شاہ نے بھی کی ہے۔