نومنتخب امریکی صدر ڈونلڈ ٹرمپ نے اپنی نئی حکومت کے اہم عہدوں کے لیے کچھ بڑے ناموں کو نامزد کیا ہے، جن میں ارب پتی ایلون مسک بھی شامل ہیں۔

رپورٹس کے مطابق، ٹرمپ 20 جنوری کو امریکا کے 47 ویں صدر کے طور پر حلف اٹھائیں گے، لیکن انہوں نے اپنے نئے دور کے لیے ابھی سے ہی اہم عہدوں کی نامزدگیاں شروع کر دی ہیں۔

انہوں نے ایک نیا محکمہ، “محکمہ برائے کارکردگی” قائم کرنے کا اعلان کیا ہے.جس کی سربراہی کے لیے انہوں نے ایلون مسک کا انتخاب کیا ہے۔ اس محکمے میں ایلون مسک کے ساتھ ویوک رامسوامی، جو ایک فارماسیوٹیکل کمپنی کے مالک ہیں، معاونت کریں گے۔

ٹرمپ نے کہا کہ یہ دونوں مل کر بیوروکریسی کو کم کرنے، غیر ضروری قوانین میں کمی لانے، فضول اخراجات کو روکنے اور وفاقی ایجنسیوں میں بہتری لانے میں مدد دیں گے۔

اس اعلان کے بعد سوشل میڈیا پر تنقید بھی ہوئی، جس پر ایلون مسک نے جواب دیا کہ وہ “جمہوریت کے لیے نہیں بلکہ بیوروکریسی کے لیے خطرہ بنیں گے۔”

واضح رہے کہ ٹرمپ کی انتخابی مہم میں ایلون مسک نے نہ صرف مالی مدد کی بلکہ اپنے سوشل میڈیا پلیٹ فارم ‘ایکس’ پر بھی ٹرمپ کی مہم کو بھرپور انداز میں سپورٹ کیا۔