بانی پاکستان بابائے قوم قائد اعظم محمد علی جناح کا یومِ پیدائش آج ملی جوش و جذبے سے منایا جارہا ہے- قائد اعظم محمد علی جناح کے یوم پیدائش پر مزار قائد پر گارڈز کی تبدیلی کی پُروقار تقریب ہوئی۔
صدر مملکت عارف علوی نے کراچی میں مزار قائد پر حاضری دی۔ اس موقع پر ان کے ہمراہ نگران وزیراعلیٰ سندھ ، گورنر سندھ اور صوبائی کابینہ کے اراکین بھی مزار پر حاضر ہوئے۔ صدر مملکت نے فاتحہ خوانی کی۔ اور مہمانوں کی کتاب میں تاثرات قلمبند کیے۔
مزار پر گارڈز کی تبدیلی کی تقریب ہوئی۔ اس موقع پر پاکستان ملٹری اکیڈمی کےچاق و چوبند دستےنےگارڈز کے فرائض سنبھالے۔
بانی پاکستان کو قوم کی جانب سے سلامی پیش کی گئی اور قومی ترانہ پڑھا گیا۔
کمانڈنٹ پی ایم اے میجرجنرل افتخار حسن چودھری تقریب کے مہمان خصوصی تھے۔ مہمان خصوصی نے بابائے قوم کے مزار پر پھول رکھے اور فاتحہ خوانی کی۔
میجرجنرل افتخار حسن چودھری نے مہمانوں کی کتاب میں تاثرات قلم بند کیے۔