کرسٹن اسٹیورٹ اور ڈیلن میئر رشتہ ازدواج میں منسلک ہوگئیں

لاس اینجلس: ہالی ووڈ کی مشہور فلم سیریز “ٹوائلائٹ” کی مرکزی اداکارہ کرسٹن اسٹیورٹ نے اپنی دیرینہ ہم جنس پرست ساتھی ڈیلن میئر سے شادی کرلی ہے۔
یہ شادی 21 اپریل کو ایسٹر کے موقع پر لاس اینجلس، کیلیفورنیا میں واقع ان کے ذاتی گھر میں ایک نجی تقریب کے دوران انجام پائی، جس میں صرف قریبی دوستوں اور اہل خانہ نے شرکت کی۔
غیر ملکی میڈیا رپورٹس کے مطابق، 35 سالہ کرسٹن اسٹیورٹ اور ڈیلن میئر کئی برسوں سے ایک دوسرے کو ڈیٹ کر رہی تھیں۔ دونوں نے حال ہی میں لاس اینجلس کاؤنٹی سے شادی کا لائسنس حاصل کیا تھا، جس کے بعد ویک اینڈ پر باضابطہ طور پر شادی کے بندھن میں بندھ گئیں۔
کرسٹن اسٹیورٹ اور ڈیلن میئر کی پہلی ملاقات 2013 میں ایک فلم کے سیٹ پر ہوئی تھی، جہاں سے ان کی دوستی کا آغاز ہوا۔ اس کے بعد 2019 میں دونوں کے درمیان باقاعدہ ڈیٹنگ شروع ہوئی، اور تین سال بعد 2021 میں منگنی کا اعلان کیا گیا تھا۔
مداحوں کی بڑی تعداد نے سوشل میڈیا پر جوڑے کے لیے نیک خواہشات کا اظہار کیا ہے، اور ان کی محبت کو خراجِ تحسین پیش کیا جا رہا ہے۔