October 9, 2025 · 1 min read
اسرائیل اور حماس کی امریکا کی ثالثی میں غزہ امن معاہدے کے پہلے مرحلے کی منظوری
اسرائیل اور حماس نے امریکا کی ثالثی میں غزہ امن معاہدے کے پہلے مرحلے کی منظوری دے دی
تل ابیب / غزہ: اسرائیل اور حماس نے امریکا کی ثالثی میں طے پانے والے مجوزہ غزہ امن معاہدے کے پہلے مرحلے کی باضابطہ منظوری دے دی ہے، جس کا مقصد جنگ کے خاتمے اور انسانی بحران کا حل نکالنا ہے۔
امریکی صدر ڈونلڈ ٹرمپ نے سوشل میڈیا پر اپنے پیغام میں کہا کہ معاہدے کے تحت تمام یرغمالیوں کی جلد رہائی ممکن بنائی جائے گی، جبکہ اسرائیلی افواج متفقہ حدود کے مطابق غزہ سے مرحلہ وار انخلا کریں گی۔
صدر ٹرمپ نے اسے امن کے طویل سفر کی پہلی بڑی کامیابی قرار دیتے ہوئے کہا کہ اس عمل میں شامل تمام فریقین کے ساتھ انصاف پر مبنی رویہ رکھا جائے گا۔ انہوں نے قطر، مصر اور ترکی کا شکریہ ادا کیا جنہوں نے ثالثی کے عمل میں کلیدی کردار ادا کیا۔
ٹرمپ کے مطابق یہ دن صرف عرب و مسلم دنیا کے لیے نہیں بلکہ اسرائیل، خطے کے تمام ہمسایہ ممالک اور امریکا کے لیے بھی ایک تاریخی لمحہ ہے۔
ذرائع کا کہنا ہے کہ غزہ میں جنگ بندی کا باضابطہ اعلان آج متوقع ہے، جس کی مزید تفصیلات آئندہ چند روز میں سامنے آئیں گی۔
دوسری جانب قطری وزارت خارجہ نے بھی تصدیق کی ہے کہ معاہدے کے پہلے مرحلے پر اتفاق ہو چکا ہے، جس میں جنگ بندی، یرغمالیوں اور قیدیوں کی رہائی، اور انسانی امداد کی بحالی شامل ہیں۔
اس پیش رفت کے بعد اسرائیلی وزیراعظم بنیامین نیتن یاہو نے کہا کہ “ہم اپنے تمام شہریوں کو محفوظ واپس لانے کے لیے پرعزم ہیں۔ یہ معاہدہ ہمارے یرغمالیوں کی واپسی کی جانب پہلا قدم ہے۔”
Post Views: 336
